Meaning ofSee meaning laashii-paashii in English, Hindi & Urdu

لاشی پاشی ’’ہیچ، حقیر، ذلیل‘‘ کے معنی میں یہ فقرہ داستان امیر حمزہ میں ملتا ہے۔ یہ فارسی میں نہیں ہے، اور اغلب ہے کہ ’’لاش/لاشہ‘‘ کے اصل معنی کی بنا پر یہ اردو والوں کی اختراع ہو اور یہ بھی ممکن ہے کہ عربی’’لاشی‘‘ بمعنی’’معدوم‘‘ کے ساتھ ’’پاشی‘‘ تابع مہمل ہو۔ معنی بہرحال وہی رہتے ہیں، یعنی’’ہیچ، حقیر، ذلیل‘‘ وغیرہ: اس نے نعرہ مارا کہ کیا تم لوگ لاشی پاشی میرے سامنے آتے ہو۔ کسی آہن تن کوہ پیکرسنگ بدن کو بھیجوکہ مزا مجھ کو شمشیر زنی کا آئے (محمد حسین جاہ، ’’طلسم ہوش ربا‘‘، جلد سوم، ص ۴۹۵)۔ ان کو لاشی پاشی و بزدل جان کر یوں گھیر گھیر کر قتل کریں گے کہ ماہیان دریا اور مرغان ہوا کو ان کے حال پر رحم آئے گا (’’ہرمزنامہ‘‘، از شیخ تصدق حسین، ص ۸۵۱)۔ چند سردار چھوٹے چھوٹے جن کو لاشی پاشی کہنا چاہئے ان کو تم نے قتل اور زخمی کیا ہے (’’ہرمز نامہ،‘‘ ص ۳۲۲)۔ دیکھئے،’’لاش‘‘، ’’لاشہ‘‘، ’’نعش‘‘۔

ماخذ: لغات روز مرہ    
مصنف: شمس الرحمن فاروقی