اردو، انگلش اور ہندی میں مَہلُوک کے معانیدیکھیے

مہلوک ’’وہ جو ہلاک کیا گیا/ہوا، ہلاک کئے گئے/ہلاک ہوئے‘‘ کے معنی میں یہ لفظ بعض اخباروں نے رائج کرنا چاہا ہے، لیکن اس کی کوئی ضرورت نہیں۔ اردو میں لفظ ’’ہلاک‘‘ ہی فاعلی اور مفعولی معنی دیتا ہے۔ ’’مہلوک‘‘ غیرضروری اور موضوعی لفظ ہے۔ ’’مہلوکہ‘‘ اس سے بھی زیادہ قبیح اور بد صورت ہے۔ اگرعربی بگھارنے کا بہت جی چا ہے تو’’مستہلک‘‘ کہیئے، ورنہ ’’ہلاک‘‘ بہت کافی ہے: غلط: زلزلے میں ہزاروں مہلوک ہوئے۔ صحیح:۔۔۔ ہلاک ہوئے۔ صحیح لیکن نا مناسب:۔۔۔ مستہلک ہوئے۔ غلط: مہلوکین کی تعداد کا پتہ نہ چل سکا۔ مناسب اور صحیح: ہلاک ہونے والوں ۔۔۔ صحیح لیکن نا مناسب: مستہلکین۔۔۔ غلط اور قبیح: حادثے میں ایک عورت کی موت ہوگئی، مہلوکہ کا نام نہ معلوم ہوسکا۔ صحیح لیکن نامناسب:۔۔۔ مستہلکہ کا نام۔۔۔ مناسب اور صحیح:۔۔۔ مرنے والی کا نام ۔۔۔ اسی طرح، ’’ہلاک‘‘ میں ’’مارنا، مارا جانا‘‘ کے معنی خود موجود ہیں، میر ؎ کرتا نہیں قصور ہمارے ہلاک میں یا رب یہ آسمان بھی مل جائے خاک میں بعض لوگوں نے’’ہلاکت‘‘ ایک غیر ضروری لفظ بنالیا ہے۔ یہ ابھی ہرجگہ رائج نہیں ہوا ہے، اگر ترک ہو سکے تو بہترہے۔

ماخذ: لغات روز مرہ    
مصنف: شمس الرحمن فاروقی